Pisinnaatitaaffitit suuppat?

Atuarnissat aamma toqqissisimanissat pisinnaatitaaffigivatit. Inersimasut atuarfimmi toqqissisimanissat akisussaaffigaat.

Atuarfippit naammagittaalliutiginissaa pisinnaatitaaffigivat, assersuutigalugu isumaqatiginngisannik aalajangiisoqarsimappat Kommunimi immikkoortortaqarfimmut atuarfinnik suliaqartumut naammagittaalliussaatit.

Qinngasaarneqannginnissat pisinnaatitaaffigivat, tamanna pillugu inersimasut ikiuuttussaapput. Meeqqat tamarmik paarilluarneqarnisartik pisinnaatitaaffigaat.

Meeqqat inuusuttullu inuunerminnut tunngasunut aaliagigassanut peqataatinneqarnissaminnut pisinnaatitaaffeqarput.

Isumaqanngilaq suna tamaat illit nammineq aaliangertassagit. Kisianni isumaqarpoq inersimasut pisoq pillugu aperisassagaatsit qanoq isumaqarnersutit – aamma isumaqarpoq oqaatigiuaannarsinnaagit aaliangerneqartoq qanoq iginerlugu.

Imaappoq angajoqqaavit akuleruffiginngisaannik ikinngutivit ilaginissaat pisinnaataaffigivat.

Aamma internetikkoortillutit namminerisannik inuuneqarnisannut pisinnaatitaaffeqarputit.

Imaappoq angajoqqaavit akuersiteqqaarnak mobiilit misissorsinnaanngilaat. Angajoqqaavit paarinissat akisssaaffigigamikku tamatigut ernumassuteqarunik akuliussinnaapput.

Sumi najugaqarusunnerit pillugu angajoqqaatit isumaqatigiissinnaanngippata, eqqartuussivimmit tusarniaaffigineqarnissat pisinnaatitaaffigivat.

Aamma Najorti-mit illersuisoqarnissat pisinnaatitaaffigivat. Najortip illit pisariaqartitavit oqaasinngortinnissaannut tusaaneqarnissannullu ikiorsinnaavaatit.

Kinguaassiuutitigut innarliineq tassaavoq inersimasup kinguaassiuutinut tunngasumik ilinnik attuuanninnera. Aamma innarliinneruvoq ilittut ukiullip kinguaassiuutinut tunngassuteqartumik illit piumanngisannik attuuappatit.

Kinguaassiuutitigut innarliinerit inatsisinik unioqqutsitsinerupput, ikiorneqarnissallu pingaaruteqarpoq.

Inersimasumit ikiorneqarnissat pisinnaatitaaffigivat. Tamanna inersimasut akisussaaffigaat. Qaqugukkulluunniit Tusaanngamut sianersinnaavutit normumut uunga: 80 11 80 imaluunniit SMS-erlutit normumut uunga: 1899.

Annersinneqannginnissamut, tukertarneqannginnissamut, siorasaarneqannginnissamut, nuanniitsunillu oqaluunneqaannaavinnginnissamut pisinnaatitaaffeqarputit.

Taamaattoqassagaluarpat ikiorneqarnissamut pisinnaatitaaffeqarputit.

Kinaanerit oqaatiginngikkaluarlugu akeqanngitsumik qaqugukkulluunniit Tusaannga attavigisinnaavat 80 11 80 imaluunniit SMS-erlutit normumut uunga: 1899 Taava qanoq ikiorserneqarsinnaanerit pillugu oqaloqatigissavatsigit.

Angerlarsimaffippit avataanut inissitaaguit angajoqqaavit takusarnissai pisinnaatitaaffigivat. Aamma angajoqqaavit ilaginissai ernumagineqanngippat takunissai pisinnaatitaaffigivat.

Angerlarsimaffippit avataanut inissitaasimaguit, Kommuni illit pillutit iliuusissanik pilersaarusiortussaavoq. Taanna tassaavoq piffissami tulliuttumi qanoq pinissaannut pilersaarut. Pilersaarutip siunertaraa illit paarilluarneqarnissat. Kommunip illit pillutit iliuusissanik pilersaarusiornerani tusarniaavigineqarnissat pisinnaatitaaffigivat. Illit kissaatigisavit oqaasinngornissaannut Najorti-mit ikiorneqarsinnaavutit.

Ulloq unnuarlu paaqqinniffik najugaqarfigisat naammagittaalliutiginiarukku, Isumaginninnermi Maalaaruteqartarfimmut Najorti peqatigalugu naammagittaalliorsinnaavutit. Taakku attavigisinnaavatit normumut uunga sianerlutit: 32 80 33

Illit pillutit naammaginngisannik aaliangiisoqarsimappat Kalaallit Nunaanni Ombudsmandimut naammagittaalliorsinnaatitaavutit.

Ombudsmandip nakkutigisussaavaa inatsisit eqqortumik malinneqarnersut aamma pitsaanerpaamik suleriaaseqartoqarnersoq. Ombudsmandi attavigisinnaavat normumut uunga sianerlutit: 32 78 10 imaluunniit annertunerusumik uani paasisaqarsinnaavutit.

Pisinnaatitaaffiit pillugit allanik paasisaqarnerorusukkuit MIO-p nittartagaa uani alakkarsinnaavat