Misilitassaq nuannersoq ilinnut kammalaatinnullu iluaqutaasinnaasoq.

Kammalaatillu immissinni nuannarisassinnik pingasunik eqqarsaateqaritsi. Suusinnaappulluunniit pitsaasutut isigisasi. Illit eqqarsaatigissavat kammalaatinni suut pingasut nuannarinerlugit kammalaativillu eqqarsaatigissavaa ilinni suut pingasut nuannarinerlugit. 

Nuannersut pingasut aalajangiutereerussigit immissinnut oqaatigissavasi.

Arlaata aliasulersittarpaatit?

Immaqa illit imminut pillutit nuanninngitsunik eqqarsaateqarputit alla illit pillutit nuanninngitsunik oqaaseqarsimammat?

Immaqa kammalaateqarputit qanoq oqimaassuseqarnerit pillugu oqaasissaqaannaavittumik imaluunniit ataatat isumaqarpa atuarfimmi pikkorinngitsutit?

Immaqa ikinnguteqarputit qanoq oqimaatsiginerit pillugu oqaaseqartuartartumik immaqaluunniit ataatat isumaqarpoq atuarfimmi pikkorinngitsutit?

Arlaanniit nuanninngitsunik oqaluffigineqartaraanni taamaaliorunnaaqullugu paasitinnissaa pingaaruteqarpoq.

Assersuutigalugu oqarsinnaavutit: “Uannut taamannak oqaluttarnerit nuannarinngilara. Aliasulertarpunga.”

Imminut unammillilaarit: Nutaamik misilitaqarit!

Sapikkatit kisiisa isiginiartarukkit, imminut naleqartinnerit nuanninngitsumik sunnerneqassaaq.

Taanna taarserlugu isumassarsiatsialaasinnaavoq imminut oqarfigissalluni ima: “Sapinngilanga.”

Imminut unammillerit, annertunngitsunik anguniagassaliortarlutit nalinginnaasumillu iliuuserisanngisannik iliuuseqartarlutit.

Suusinnaappulluunniit, soorlu tiimini peqataaneruneq, sunngiffimmi sammisassamik nutaamik misiliineq, inunnik nutaanik oqaloqateqarneq allarluinnarluunniit – illit nammineq isumassarsiarisat.

Allanit ikiortissarsiorit, misigissutsitillu oqaluttuaralugit

Imminut pilluni nuanninngitsunik eqqarsaateqartaraanni, misigissutsit tamakku kisermaannissaat artornarsinnaasaqaaq.

Misilillugu inunnut allanut ammarnerugit qanorlu misigisimanerit oqaluttuaralugu – immaqa paasilissavat taama misigisimasuni kisimiinnak?

Assersuutigalugu oqarsinnaavutit: “Ilaanni misigisarpunga sunut tamanut inorsartutut imaluunniit isikkora nuannarisarnagu. Aamma illit taama misiginikuuit?”

Timigissarneq iluaqutaasarpoq

Timigissarneq sanigorsernerinnaanngilaq.

Aamma timigissartoqarsinnaavoq timikkut misigissuseq iluartoq misigerusullugu.

Timigissaraannimi qaratsami endorfinit pinngortinneqartarput, taakkulu tassaapput stoffit timimiittut pilluarnermik misigititsisartut.

Timi paarilluaraanni aammattaaq nammineq timi nuannernerusumik eqqarsaatigineqarsinnaalersarpoq.

Kisianni pingaartuuvoq eqqaamassallugu sakkortuallaamik sungiusartannginnissaq, tamannami imminut nuannarinerulernermik kinguneqartanngilaq.

Suna tamaat torraqqissaartinniartariaqanngilat

Eqqaamajuk kinaluunniit torraqqissaarsinnaanngimmat. Inuinuna tamatta assigiinngitsuulluta assigiinngitsunik pitsaaquteqartugut, taakkualu pingaarnerpaapput.

Arlaannut asannileraangatta asannilerfitta pissuseerai eqqumeequteeraalu asannilerfigisarpagut.

Illit nammineerlutit kisivit qanorittuunnerit ilisarnaatitillu eqqarsaatigikkit.

Immaqa arlaannik pikkoriffigisaqarputit, immaqa milaaraqarnerit ilisarnaatigivat imaluunniit allarluinnarmik ilisarnaateqarputit.

Illit kammalaatit qanoq oqaluutissagaluarpiuk?

Ilaannikkut immitsinnut ajortumik pisoortarpugut eqqarsarluta allat tamarmik uagutsinniit torrannerullutillu kusanarnerusut.

Kisianni takorluularuk illit kammalaativit oqarfigippatit imminut nuanniigisarluni, taava illit kammalaatit tapersersorusussanngiliuk oqarfigalugulu nuannersuusoq kusanarlunilu?

Takorlooruk kammalaatit imminut nuanniigaluni eqqarsaateqartoq, maannalu takorlooruk siunnersuutinik pingasunik iluaqutigisinnaasaanik oqarfigalugu. Taamaaleriarlutit siunnersuutit taakku ilinnut oqaatigikkit.

Iluatsittoqaraangat imminut tuikkut pattalaartarit

Nutaamik misilitaqarsimaguit, kammalaataalluaruit, suliassaq ajornakusuulaartoq naammassisimagukku, allanilluunniit misigisaqaraangavit imminut pikkorigilaarnissat eqqaamasariuk. Imminut oqarfigisinnaaneq ima:”Pikkoripputit!” pitsaasuuvoq.

Aamma assersuutigalugu nutaanik qarlittaarsimallutit imminut kusagiguit, imminut kusanarneralaarnissat eqqaamasaruk. Oqaatsit nuannersut imminut tunniuttarneri imminut tatiginermut pitsaasumik sunniuteqartarput.

Ilinnut nuannaalersitsisartut aallutikkit.

Nuannaarnarisanik sammisaqarluni isumagissaarnartarpoq – aamma nuannarisanik iliuuseqarnermi timimi nuanniigisat soorlu naanni orsut amimiluunniit tasinnerit eqqarsaatigeqqajaanannginnerusarput.

Taamaammat eqqaamajuk ilinnut nuannaalersitsisartunik sammisaqarniartarnissat.