Nuannaarnerulerit

Ulloq siulleq: Imminut ajunngisaarfigigit

Ullumikkut una uteqattaarlugu imminut oqaatigisaqattaassavat: “Inuk ajunngitsuuvunga, nuannaarsinnaavunga ikinnguteqarsinnaallungalu.” 

Iliuusissaq: Pappialamut allattaavinnulluunniit imminut allaffigigit. Tassani illit illiunerit pillugu nuannarisatit allattussavatit. 

Ullut aappaat: Silarsuarmut asanninnerit nassiuguk

Ullumikkut una uteqattaarlugu imminut oqaatigisaqattaassavat: “Asanninneq silarsuarmut nassiussara uannut utertinneqassooq. Kisimiinngisaannarpunga”

Iliuusissaq: Pappialamut uummataasamik titartaagit qalipalluguluunniit. Qulaatigut allaguk “Asanninnermik nassippakkit” pappialarlu asasappit arlaannut tunniullugu.

Ullut pingajuat: Nuannaarutissaaqqat maluginiakkit

Ullumikkut una uteqattaarlugu imminut oqaatigisaqattaassavat: “Inuuninni nuannaarutissanik nassaarsinnaajuaannarpunga”

Iliuusissaq: Ullumikkut nuannaarutissaaqqat maluginiakkit. Soorlu immaqa ullormut ilaquttat illaqatigilaarneri, ullormut inuit ilinnut qungujuttut, imaluunniit illit allanut inussiarnersuusinnaanerpit nuannaarutiginera. 

Ullut sisamaat: Imminut upperigit

Ullumikkut una uteqattaarlugu imminut oqaatigisaqattaassavat: “Nukittuvunga, sapiitsuuvunga nalitullungalu, Sunaluunniit unammillernarsinnaasoq qaangersinnaavara.”

Iliuusissaq: Pikkoriffitit angusarinikuusatillu allattukkit. Allattukkatit nipituumik imminut atuakkit sapinngitsuunerillu upperiuk.

Ullut tallimaat: Misileraagit

Ullumikkut una uteqattaarlugu imminut oqaatigisaqattaassavat: “Isumassarsiorsinnaavunga misileraallungalu. Periarfissakka killeqanngillat”

Iliuusissaq: Nuannersumik qungujunnartumillu sammisaqarit. Assersuutigalugu qitillutit, tarrarsuutikkut mitarrittaarlutit imminut illartillutit imaluunniit sumilluunniit nutaamik misilinnikuunngisannik mislitaqarlutit. 

Ullut arfernat: Nuannersut isiginiakkit

Ullumikkut una uteqattaarlugu imminut oqaatigisaqattaassavat: “Periarfissat nuannaarnerlu siuninni takusinnaajuaannarpakka. Nuannersut isiginiarnissaat toqqarpara”

Iliuusissaq: Qungujunnarisatit illarnarisatilluunniit pingasut allakkit. Nuannaajallaatissatullu qiviallattaasakkit allatatit.

Ullut arfineq aappaat: Inussiarnersuugit

Ullumikkut una uteqattaarlugu imminut oqaatigisaqattaassavat: “Inoqatinnut inussiarnersuuvunga. Nuannaarnermik siaruarterisuuvunga”

Iliuusissaq: Ullumikkut misiliillutit inoqaternut inussiarnisaarlutit ikiuutilaarit. Assersuutigalugu nerilerussi ilaquttatit nerriviliorlutit ikiorlugit imaluunniit kammalaatit nersualaarlugu.