Hej niviarsiaraq 11-inik ukiulik
Qujanaq Tusaanngamut allakkavit.
Ilaatigut qanoq innerluni oqarnissaq ajornarsinnaasarpoq, taamaammat qujanarpoq Ikioqatigiittamut allakkavit qanoq innerlutit. Soorlu eqqaagit timit nuannarinagu aammalu ilinniartitsisorisanninngaanniit timikkut attuuaneqarsimasutit.
Ernumaammerpunga allakkavit ilinniartitsisorisappit attuuasimagaatit. Ilinniartitsisorisappit atisavit iluatigut attorpaatit? Imaluunniit nissuvit akornisigut, iviagikkulluunniit attorpaatit? Misigivit attuuaneqaravit killissannik qaangiiffigineqarlutit? Qaangiiffigineqartutut misigiguit pingaaruteqarpoq inersimasoq tatigilluinnakkat susoqarsimaneranik oqaluttuunnissaa. Oqaluttuarnissannullu ersissuteqaruit Tusaannga attavigiuaannarsinnaavat. Maani inersimasut oqaloqatiginninnissamut piareersimajuaannarput, tusarnaallaqqissuupput ikiorsinnaavaatsillu qanoq iliornissannut. Sianersinnaavutit 80 11 80-imut, SMS-erlutit 18 99-imut imaluunniit chattersinnaavutit www.tusaannga.gl – imut iserlutit. Sianerneq allannerlu akeqanngilaq, kinaanersutillu paasinavianngilarput aammalu suminngaanniit sianernerit ersinnavianngilaq – Illit nammininnguaq aaligissavat kinaanerit paasitikkusunnerlugu.
Meeqqat allat Tusaanngamut attaveqartarput ilittut assigusumik misigisaqarsimallutik, aamma meeqqat oqaluttuartarput timertik nuannarinagu maajunnartorlu. Eqqaamassavat illit pisuussutiginngisaannarakku killissatit qaangerneqarpata. Inersimasup paarisussaavaatit sianigalutit ajortunut. Taamaattumik pitsaassaaq qanoq inninnik paasititsiilaarsinnaaguit, qanorlu misigisaqarsimanerlutit oqaasinngorlugu.
Inussiarnersumik Tusaannga
