Assinik siaruarterisarneq pillugusiunnersuutit pitsaasut
Pingaarutilik:
Inunnut Ilisarisimanngisannut assinik nassiussinngisaannarit
Nittartakkatigut pingaartumillu ilisarisimanngisannut aamma ukioqatigigaluarukkuluunniit nammineq assinnik nassiussinngisaannarit.
Inersimasut ilai meeraasuusaartarput meeqqallu assinginik nassitsinniarsarisarlutik, assinillu nassinneqarsimagunik siorasaarutitut atorsinnaasarlugit.
Assimik nassiussisimaguit asseq kikkut takussaneraat aamma siaruarneqannginnissaa aqussinnaanngilat. Arlaata assimik nassequlluni piumaffigippatit inersimasumut tatigisannut oqaatigiuk. Naameerneq ajortuunngisaannarpoq.
Illit assit siaruarterneqarpa?
Illit assit videotilluunniit akuerinngisarnik siaruarterneqarsimappat illit pisuussutiginngilat aamma ajortumik iliuuseqanngilatit.
Imaassinnaavoq assitit videolluunniit tatigisannut nassiutissallugit nuannarigit. Kisianni nassiussivigisavit akuerinngisarnik ingerlateqqikkunigit taannaavoq ajortumik iliortoq – illiunngitsoq.
Aap, sissuertussaavarput assigut kimut nassiunnerlugit. Kisianni eqqaamassavat akuerinngisarnik siaruarterisup eqqunngitsuliortuunini akisussaaffigimmagu – illiungitsoq.
Illit allap assiinik siaruartereqataavit?
Immaqa eqqarsaatigilluaqqaarnagu taama iliorsimavutit.
Assit siaruartersimasatit slet-ernissai pingaariteqarpoq, nassiussiffigisimasatillu slet-erinissaannik piumaffigisavatit.
Aamma inersimasumut tatigisannut oqarnissaq pingaaruteqarpoq, inersimasormi siaruarterinerup unitsinnissaanut ikiuussinnaavoq aamma illit ikioqquguit ikiortussaavaatit.
Imak oqaatigisinnaavat
Akuerinngisarnik assitit siaruarterneqarsimappata inersimasumut oqarnissaq sapernaqqaarsinnaavoq. Siullertulli imminut illersorniarlutit assivit siammarterneqarsimanerisa oqaatiginissai pingaaruteqarpoq. Oqarnialeruit qanoq iliorsinnaanernut siunnersuutit ataani atuakkit.
Inersimasoq tatigisat oqarfigiuk
Pimoorullugu ilinnut ikiuussinnaasoq toqqaruk. Angajoqqaajusinnaavoq, ilinniartitsisoq allaluunniit toqqissisimaffigisat arlaat.
Susoqarnersoq eqqortumik oqaatigiuk
Aallaqqaammut susoqarsimanera oqaluttuareqqissaaruk. Assersuutigalugu oqarsinnaavutit: “Oqaasissaqarpunga, – assikka akuerinngisannik siuaruarterneqarsimapput.”
Pisoq nasusiaqqissaaruk
Qanoq pisoqarsimanera eqqortumik nassuiaruk. Kina assinik siaruarterisimanersoq, soorlu; inuit attaveqaataat sorleq siaruarteriffiusimanersoq, kikkut assit takusimaneraat sapinngisamillu nalunngisatit siaruarterisimasut atii tamaasa oqaatigikkit.
Qanoq misigisimanerlutit oqaluttuariuk
Qanoq misiginerit inersimasumut tatigisannut oqaluttuariuk. Imaassinnaavoq killissarnik qaangiiffigineqartutut misigisutit, annikilliorlutit, nalornillutit aliasullutilluunniit.
Paasineqarneq iluaqutaasarpoq.
Pisinnaatitaaffitit paasiniakkit
- Atisaqanngitsunik imaluunniit atisaqarpianngitsunik assinik siaruarterisoqaqqusaanngilaq. Inerteqqutaalluinnarpoq, taamaattumik Politiinut unnerluutigineqartassapput
- Inuk akuersiteqqaartinnagu piareersimanngitsorluunniit assilineqaqqusaanngilaq aamma asseq inuttaanit akuerineqanngippat siaruarteqqusaanngilaq.
- Aliasutsitsiniaannarluni assinik siaruarterineq iliuusaavoq kusanaatsoq. Qinngasaarineruvoq kukkunerullunilu annertooq.
- Assinik atoqatigiinnermut tunngassunik meerartalinnik assiliinngisaannarit aamma takusaqarnianngisaannarit. Tamannami unioqqutitsinervoq annertooq.
Allakkamik allagit
Inersimasumut oqarnissat ajornartikkukku allaffissamut allallutit misilissinnaavat. Malitassaliarput Allakkamik allagit iserfigiuk oqaloqatigerusussinnaasallu allaffigalugu. Allakkiat screenshotersinnaavat oqarfigerusutannullu takutillugu.
Eqqunngitsuliortoqarsimappat qanoq nalunaarutigisinnaaviuk?
Pinnerluutaasoq politiit allaffeqarfianut nalunaarutigisinnaavat imaluunniit 701448-mut nalunaarutiginnillutit sianersinnaavutit .
Illit, ilaquttat ikinngutilluunniit nittartakkatigut kinguaassiuutit pillugit atornerluisoqarsimappat imaluunniit assinik siammarterisoqarsimappat imminut siunissallu eqqarsaatigalugit imaluunniit inuk alla illersorniarlugu politiinut nalunaarutigisussaavat.
Illit akuerinngisannik assinik videonilluunniit siaruartoqarsimappat inersimasumut tatigisannut ikoqqullutit oqaatigiuk. Aamma kinaluunniit nittartakkatigut assinik videonilluunniit piumanngitsutit nassiussiniarsarippat imaluunniit piumanikuunngisarnik nassiussisimappat unnerluutigineqartariaqarpoq. Taamaattumik pingaaruteqarpoq toqqissisimanngikkuit inersimasumik oqaloqateqarnissat.
Politiit qanoq iliussappat?
Nittartagakkut kinguaassiuutitigut atornerluineq nalunaarutigineqassappat pingaaruteqarpoq pisimasoq allaaserissallugu, tassami politiit qanoq pisoqarsimanersoq inatsisillu sorliit unioqqutinneqarsimanersut paasiniarnissaannut iluaqutaasarmat.
Uppernarsaatinik katersuiniarnissaq politiit suliassaraat, kisianni nittartakkami assit videollu sukkasuumik tammarsinnaapput. Taamaattumik ikiuussinnaavutit nittartakkami/app-imi takutinneqartumi atortussanik downloaderinikkut imaluunniit screenshoterinikkut.
Unnerluussummik tigusineq: Politiit unnerluussut suliarilerangamikku unnerluussisumut sianertarput imaluunniit aggersaasarput. Pisoq pillugu allaaserisaqartarput aammalu tunngaviusumik paasissutissanik soorlu piffissaq, sumiiffik aammalu peqataasut katersortarlugit.
Pissutsinik nalilersuineq: Politiit nalilertarpaat suliaq sukkasuumik iliuuseqarfigisariaqarnersoq, imaluunniit pisoq kingusinnerusukkut aaqqiivigineqarsinnaanersoq.
Paasiniaaneq: Politiit paasiniaaneq aallartissinnaavaat, uppernarsaatinik katersuiniarlutik, takunnittunik pasisaasunillu apersuillutik, aammalu pisariaqartinneqarpat oqartussat allat suleqatigisinnaallugit. Aammattaaq paasissutissanik allamik imaluunniit allakkianik tunniussinissat piumasarisinnaavaat.
Malinnaaneq: Suliaq pillugu politiit paasissutissiisinnaasarput, ingammik paasiniaanerup ingerlannissaa pisariaqartinneqarsimappat imaluunniit unnerluussisoqarnissaanut kinguneqartitsissagunik, soorlu eqqartuussisoqasappat.
misissuineq
Nittartagaq qanoq isumaqarfigaajuk?
